مفعول السحر 1 : و فجأة كل شيء تغير و فجأة ....!

... و فجأة صحيت من النوم و لقيت كل حياتي اتغيرت، حققت كل احلامي، و مشيت في طريقي بقوة و ثبات، و بقيت شخص مختلف، الحزن إلي كنت شايله في قلبي زال، الحيرة و الشك حل مكانهم اليقين و الأيمان.

مش عارف اوصف قد ايه الأمور واضحة قدامي، قد ايه انا حاسس بالحياة بكل حواسي، لكن الشيء الوحيد إلي اقدر اوصفه و متأكد من أنك حتندهش لما تعرفه: هو أني مش سعيد بالدرجة إلي انت متخيلها، و متأكد كمان انك حتندهش أكتر لما أقولك أن ده مش وحش، و أنه هو الأصل في الحياة إلي لازم نعيشها مرة بسعادة و مرة بحزن و شجن و ألم، مرة باحباط و مرة بحماس و إصرار و كفاح، مرة بهدوء التأمل و مرة بإنطلاق واحد مجنون عمره ما عرف يعني ايه منطق أو عقل، ....

و هنا الخيال ممكن ينتهي علشان اعتذر لك عن السطور السابقة و اقولك أن رغم أن الحادثة إلي وصفتها لك من شوية مش صحيحة مئة في المئة إلا انها مش بعيدا ابدا عن حالة باعيشها دلوقتي.

و هنا اقدر اقول لك قد ايه انا غبي علشان عايش باحلم اني اقول كلام زي ده في يوم من الأيام، في حين أن كل يوم عيشته يستحق أقول فيه كلام زي ده و اكتر!