"يسعد مساك يا خواجه، النبي تديني ابرة وابور جاز بسرعة عشان الافندي على وصول و لسه محضرتلوش الاكل"
او
" نهارك سعيد يا باشا، الاتوموبيل بتاع ساعدتك جاهز علشان يوصلك الوزارة "
او
" انت فاكرينها تكية... ، إن مدفعتوش الإيجار آخر الاسبوع ده حارمي لكم العفش في الشارع "
او
" اواواواواو ، بقى الارض كرويتون تلف حول نفسيها "
لو حد كلمك كده ، اكيد حتتريق عليه
طبعا ما هو اصل الدنيا اتغيرت و لا متغيرتش؟!
احنا فعلا مبقناش نتكلم بنفس الطريقة بتاعة زمان ، الفاظنا و نبرات صوتنا اختلفت، طب هوه ده معناه ان طريقة تفكيرنا اتغيرت؟
الست إلي كانت عايز ابرة وابور جارز (و الله اعلم فيه حاجة اسمها ابرة وابور جاز و لا انا إلي بأللف) كانت ممكن تكون لابسه يشمك و اسمها ايه ديه! حابرة ، على العموم انا مش عارف ايه هوه اليشمك ده اساسا، انا قلت يشمك علشان مقولش نقاب لأن كلمة نقاب حتدي صورة ذهنية مختلفة
ما علينا الست ديه بالشكل ده و بطريقة الكلام ديه مش موجودة دلوقتي، لكن الست إلي بتلح على البياع إلي عمره ما حيكون خواجه بأي حال من الاحوال في عصرنا ده علشان يديها طلباتها بسرعة علشان تلحق تعمل الأكل للافندي جوزها (افندي ديه شتمية حاليا او استهزاء) افتكر انها موجودة و مختفتش، هيه حتختفي ازاي صحيح؟! و ايه الصورة إلي ممكن تبقى عكس كده؟ و ازاي الدنيا توصل للصورة ديه؟
بلاش الاسئلة إلي فاتت و خلينا في سؤال واحد، هي الست
اختلفت او بتختلف او حتختلف في يوم من الايام ؟
طبعا الاتوموبيل إلي كان بيوصل الباشا للوزارة مكنش يعرف انه في يوم من الايام حيركبه أي حد معاه فلوس و خلاص و يبقى اسمه باشا كمان من غير ما ياخد الباشوية من الملك، يعني فيه باشوية شعبية دلوقتي ، لكن الباشوية الرسمية لسه ليها ناسها برضه، ايوه الاتوموبيلات انتشرت و كمان اتغير اسمها بقى اسمها عربيات يعني و اتطورت بشكل كبير، لكن لسه الباشا فيه ناس بتحضر له العربية و بتسوقهاله علشان يوصل الباشا الوزير للوزارة، يعني لسه الوزير باشا حتى و لو مكنش باشا قبل الوزارة فهو بالتأكيد حيبقى باشا بعدها
الاتوموبيلات حالها اتغير، لكنها لسه اتومبيلات ، اما الباشا الوزير و الباشا اللوا و الباشا الظابط و الباشا امين الشرطة فانا مقدرش احكم عليهم!
و التكية (ككلمة) الحمد لله لسه موجودة و لسه بنستخدمها (ككلمة و الله و مقصدش حاجة) ، و لسه صاحب البيت له السلطة ...لا لا لا، الجملة تتقال كده ، و رجعت لصاحب البيت السلطة انه يمشي ساكن عنده طالما موافقش الساكن على رفع الايجار عند تجديد العقد، هوه طبعا لازم نحترم ده لأن صاحب البيت اتظلم في وقت من الاوقات، لكننا لسه بنتكلم عن الساكن إلي ممكن يلاقي نفسه في الشارع لأنه ميقدرش يدفع ايجار الشقة إلي هوه فيها او الشقة إلي ممكن يسكن فيها بعد كده و ده طبعا لأن الاسعار نار في الايجار و غيره طبعا
اه فعلا محدش يقدر يرمي العفش كده من الباب للطاق و بسهولة و بالشكل إلي كنا بنشوفه في افلام زمان لكننا في الآخر حنسأل سؤال، هوه في الآخر مصير الساكن بتاع دلوقتي اتغير عن مصير الساكن بتاع الافلام زمان؟!
اما صاحبنا إلي بيتريق على الكرة إلي بتلف ، انا عن نفسي مش متأكد انه موجود زمان اساسا بالشكل ده (طبعا لأن ديه صورة كوميدية)، لكني متأكد ان الجاهل كان له مكان زمان و دلوقتي ، و انه زمان (و الله اعلم عن دلوقتي) كان له مساحة كبيرة في المجتمع، و كان مع ذلك بيتخطى حدوده مع العالم (انا باتكلم عن زمان فاهمين علشان محدش يقول اني باقول حاجة)، و كان مبيتكسفش من جهله و كان عنده قدر من الحرية انه يقول اي كلام و خلاص بدون علم في أي موضوع و انه يجادل و خلاص و يرفض افكار او اوضاع لمجرد انها مش مريحاه او مش قادر يستوعبها في نفس الوقت إلي مبيطلبش فيه التوضيح او التبسيط، و اصبحت (اقصد كانت) جملة " انا مش قادر استوعب" هي اسلوب اعتراض
مش اسلوب استفهام.
المهم الصورة بتاعة الراجل الجاهل ديه مش هي نفس الصورة إلي احنا بنشفها دلوقتي (على الاقل في الافلام الكوميدية) لكن يا ترى هوه الجاهل اختلف؟ طب و الجهل نفسه لسه له نفس التعريف و لا اتغير هوه كمان؟!
ايه الكلام ده كله! هوه انا عايز اقول ايه ؟! مش مهم انا عايز اقول ايه ! المهم الصورة بتقول ايه؟
افتكر كويس الاربع جمل و حاول ترسم الشخصيات إلي هي اطراف في الجمل ديه، حطها جنب بعض و صورها، عيد صياغة الجمل ديه تاني بشكل عصري و عيد رسم نفس الشخصيات بس خليها شبه شخصيات عصرنا ده، حط الصورتين جنب بعض، و افتكر كويس الناس إلي حولوا يغيروا دور المرأة و الناس إلي حاولوا يخلو الناس في مستوى طبقي واحد و إلي حاولوا يعملوا ضمان و أمان و اسقرار اجتماعي للناس كلها و اخيرا الناس إلي حاولوا ينشروا العلم و يفتحوا مدارك الناس، ايوه افتكرهم كويس و افتكر دورهم و اسأل نفسك همه غيروا في جوهر الناس إلي في الصورتين و لا غيروا شكلهم بس؟ اسأل نفسك مرة اخيرة: هوه كان حد يقدر يغيرههم؟ و لا ديه حاجات مبتتغيرش؟!